Ataasiakkaanut iliuusissatut pilersaarutit

Iliuusissatut pilersaarut tassaavoq anguniakkap anguniarnerani suleriaasissanik allaatiginninneq. Iliuusissatut pilersaarummi ersarissisarpoq:

• Anguniagaq anguniakkalluunniit suunerinik
• Anguniakkat qanoq anguniarneqarnissaannik
• Kikkut suliami akisussaanersut

Meeqqat atuarfiat atuartunik sullissinermini iliuusissatut pilersaarusiortarpoq. Atuartut ataasiakkaat iliuusissatut pilersaarutaat atuartitsissutini ataasiakkaani angusassat atuartullu piginnaasaat tunngavigalugit suliarineqartarlutik.

Ikinnerpaamik ukiumut marloriarluni atuartut tamaasa atuartitsissutini tamani iliuusissatut pilersaarusiuunneqartassapput.

Atuartut ataasiakkaat ilinniartitsisutik peqatigalugit itinerusumik sammerusutaminnik allattuissapput. Ilinniartitsisup atuartoq qulequttanik tulleriiaarinerani ikiussavaa. Imaassinnaavoq atuartup taggisit qasseersiutinngortinneri, oqaluutit oqaaseqatigiiliornerilluunniit ilinniartariaqarai.

Atuartunut ataasiakkaanut iliuusissatut pilersaarusiornerup ilaatigut siunertaraa, atuartut siunniussanik tamanik ilinniagaqarnissaat qulakkeerniassallugu, kiisalu angajoqqaanik suleqateqarnissaq aqqutissiuutissallugu.

Malugiuk
Angajoqqaatut qulequttanik meeqqannut ilinniartikkusutannik kissaateqarsinnaavutit. Aammattaaq meeqqavit atuarfianut meeqqavit iliuusissatut pilersaarutaata assilineranik sukkulluunniit piumasaqaateqarsinnaavutit.

Iliuusissatut pilersaarutit angerlarsimaffiup atuarfiullu akornanni oqaloqatigiinnerni angajoqqaanilluunniit ataatsimiititsinerni aallaaviusassapput. Ukiumut marloriarluni angerlarsimaffiup atuarfiullu akornanni oqaloqatigiittoqartassaaq. Angajoqqaat oqaloqatigiinnissaq sioqqullugu meeqqamik atuartitsissutini tamani iliuusissatut pilersaarutaat pereertassavaat.

Atuartut ataasiakkaat atuartitsissutini assigiinngitsuni iliuusissatut pilersaarutaasa ilinniartitsisunit katersorneqarnissaat klassimi ilinniartitsisumit akisussaaffigineqarpoq.