Katersugaasiviit – Illut eqqissisimatitat eriagisassallu

Illuliortarnermik kulturi tamattaalluta susassaqarfitta iluaniippoq. Ulluinnarni avatangiisitsinut ilaavoq illut akornanni angalaartuaratta. Taamaattumik illuliornermik kulturip paarilluarnissaa tamatta akisussaaqataaffigaarput.

Illut ilai eqqissisimatitaapput allallu eriagisassaallutik.


Illut eqqissisimatitat
Illu eqqissisimatitaq tassaavoq illu ilusilersorneqarnermigut imaluunniit kulturikkut oqaluttuarisaanikkut immikkoorutilik nunatta oqaluttuarisaanerani piffissaq aalajangersimasoq pillugu takussutissiisoq.

Nunatta Katersugaasivia Allagaateqarfialu Namminersorlutik Oqartussat sinnerlugit illunut eqqissisimatitanut akisussaasuuvoq.

Eqqissisimatitsineq nalinginnaasumik illup silataanut iluanullu atuuppoq, illullu aserfallatsaalinissaanut iluarsartuunnissaanullu ersarissunik maleruagassaqarpoq. Illumik eqqissisimatitamik aserfallatsaaliiniarnerit iluarsaassiniarnerilluunniit sioqqullugit Nunatta Katersugaasivia attaveqarfigissavat. Atortussat suleriaasissallu pillugit Nunatta Katersugaasivianit siunnersortissinnaavutit.

Illuliornermik kulturip tammatsaaliornissaanut tamatta akisussaaqatigiippugut. Illunik piginnittuunngikkuit imaluunniit atuisuunngikkuit eqqissisimatitassatut kissaatigisannik, najukkanni katersugaasivik, kommune, imaluunniit peqatigiiffik tammatsaaliuinermik soqutigisalik illup eqqissisimatitanngortinnissaanik siunnersuuteqarfigisinnaavat. Illumik piginnittuuguit imaluunniit atuisuuguit illup eqqissisimatinneqartariaqarnera toqqaannartumik Nunatta Katersugaasivianut siunnersuutigisinnaavat. Siunnersuutit Nunatta Katersugaasivianit nalilersortikkumallugu makku nassiutissavatit:

• Illup iluaniit silataaniillu assilisat
• Paasissutissat allat eqqissisimatitsinissap nalilersorneqarneranut pingaaruteqarsinnaasut

Illu ima pingaaruteqartigissaaq, allaat Kalaallit Nunaanni inuiaqatigiit pigisaattut pingaaruteqarsorinarluni.


Illut eriagisassat
Illut eriagisassat illoqarfimmi pineqartumi illuliornermi ileqqunik, illunik ilusilersueriaatsinik kulturikkut oqaluttuarisaanermut tunngasunik takussutissiisussaapput.

Illut eriagisassat kommunimit akisussaaffigineqarput. Kommunimut pilersaarummi imaluunniit illoqarfimmut pilersaarummi nalunaaqqasarput. Kommune illunik eriagisassanik toqqaanerminni toqqammavigisartagaasa ilagaat:

• Illup ilusilersorneqarnera; illup immikkoortuisa annertussutsimikkut imminnut tulluartuunerat, silataa tungaata isikkuata ataqatigiilluarnera aamma illup peqqissaarussamik ilusilersornerneqarsimanera
• Ilusiliussap sananeqaatit illullu atorneqarnissaanut siunertat ataqatigiinnerat

Illu eriagisassatut toqqarneqaraangat silataa tungaanut tamaallaat atuuttarpoq. Taamaattumik illup eriagisassap silataa aserfallatsaaliniarukku imaluunniit iluarsaanniarukku kommune attaveqarfigissavat. Kommunimit illup silataata suliarinissaanut akuersissummik pitinnak sulineq aallartissinnaanngilat.