MitID-mik atuinissamut ikiorneqarneq

MitID-mik pisaarnikuuit ikiorneqarnissannillu pisariaqartitsillutit? Taava uani MitID-mi qanoq ikiorneqarsinnaanerlutit, qanorlu MitID-mi sulialinnut ikiorneqarsinnaanerlutit (assersuutigalugu mobiileerseruit), aammalu MitID-taaruit qanoq iliussanerlutit kiisalu MitID-mi paasissutissaatitit qanoq suliarisinnaaneritit uani paasisaqarfigisinnaavat.

MitID-mit kinaassutsimut uppernarsaatit atorlugit isertoqarsinnaavoq. Pisortaqarfiit namminersortulluunniit imminut sullinnissamut aaqqiissutaannut illit inuttut kinaassutsinnut uppernarsaatissat isumannaatsoq.

MitID appi atorlugu isernissamut ilitsersuut suliarineqarnikuuvoq.

Una toorlugu "MitID app-imut isernermut ilitsersuut aajuk"

Ikiorneqarnissamik pisariaqartitsiguit kommunerisanni innuttaasunut sullissivik, nunaqarfinniluunniit allaffik saaffigisinnaavat.

Aamma tatigisannut ikioqqusinnaavutit.
Imaassinnaasoq ilaquttat ikinngutilluunniit ikiuussinnaasoq.

Eqqaamallugu ataani allassimasut siammartissannginnakkit:

• Koditit
• MitID-mi kodinut takutitsissutit immaqaluunniit atuffassissut
• Atuisutut ilisarnaatit

Immikkuullarissumik pisoqartillugu MitID-mi kiffartuussivik attavigisinnaavat.
*”Qaqugu kiffartuussivik saaffigissavara”-mi atuarit.

Pisuni immikkut ittuni MitID pillugu ikiorsiivik Danmarkimiittoq attavigisariaqarsinnaavoq. Assersuutigalugu oqarasuaatit katassimagukku atortorissaarutinilu allani MitID appi ikkussimanngikkukku ikiortariaqalersinnaavutit. Taamaattumik atortorissaarutini arlalinni MitID appi ikkullugu MitID-mut backupiliornissaq pitsaasuussaaq, assersuutigalugu oqarasuaatinni aamma tabletinni.

MitID pillugu ikiorsiivimmit ikiortariaqarninnut assersuutaasinnaapput:

• Oqarasuaatit katassimagukku MitID.dk-kkullu MitID appi matutissinnaanagu
• MitID atukkat ajortumeerniarneqartoq pasitsaassaqaruit MitID.dk-kkullu MitID appi matutissinnaanagu
• MitID pillugu pinartumik ikiortariaqaruit

Danmarkimi MitID pillugu ikiorsiivimmut attaveqarit

Oqarasuaat:
+45 33980010

Maili:
https://support-mitid.digst.dk/

Ammasarfiit  
- Ataasinngornermiit tallimanngornermut nal. 04.00-16.00. (Nunatsinni nalunaaqutaq)  
- Arfininngorneq, sapaat sapaassuarnilu nal. 06.00-12.00. (Nunatsinni nalunaaqutaq)  

Periarfissatut kommunerisat MitID-mik atuutilersitsinissamut piareersimappat najukkanni innuttaasunik sullissivimmut saaffiginnissinnaavutit.

Malugiuk
Danmarkimi MitID pillugu ikiorsiiviup attaveqarfiginerani oqaatsit qallunaatut atorneqarmata.

MitID-tut atukkavit paarilluarnissaa pingaaruteqarpoq. Taamaammat siunnersuutit tallimat malikkit:

1. Kodetit allanut takutinngisaannakkit
2. MitID appi, kodemik takutitsissut kodemilluunniit atuffassissut allanut tunniutinngisaannaruk
3. Atuisutut ID allanut siammartinngisaannaruk – MitID pillugu ikiorsiivimmut nammineerlutit attaveqaruit taakkununnga siammartersinnaavat
4. MitID atorlugu akuersinngisaannassaatit assersuutigalugu aningaaserivimmeertuusaartoqarluni, ikiorsiivimmeertuusaartoqarluni allarluinnarmeertuusaartoqarluniluunniit sianerfigitikkuit, e-mailerfigitikkuit imaluunniit pulaarneqaruit. Tamanna pillugu taamatut attavigineqartarunnanngilatit
5. MitID atorlugu akuersinialerninni suna akuerinialernerlugu maluginiaqqissaartassavat. Iliuuseriniakkannut allagaq naapertuutinngippat imaluunniit nammineerlutit iliuuseqarniartuunngikkuit, akuersissuteqartassanngilatit.
   
   

MitID-mik pisaaraluaruilluunniit NemID pigiinnarallassavat. NemID-p atorunnaavinnissaata tungaanut sumiiffiit ilaanni NemID atorallartussaavoq.

Mobileerseruit MitID appi mobilinnut katatannut attuumassusilik matutittariaqarpat. MitID.dk MitID-mulluunniit kiffartuussivik aqqutigalugu matutitsisinnaavutit.

MitID-vit annaanissaa pinaveersaartinniarlugu devicenut arlalinnut MitID appi ikkussinnaavat – soorlu mobilinnut tabletinnullu. Taamaalillutik mobilitaaruit MitID appi ikkuteriaannaassavat. MitID-tut atukkatit allaappata, soorlu kodimik takutitsissut, taava MitID.dk-mut iserlutit atuutilersitsinissamut kodimik pisinnaavutit MitID appitaarisannullu kodimik atorallagassamik nassinneqarlutit.

MitID appi peertoorsimagukku, allamillu atugaqarnak – soorlu kodinut takutitsissut – taava MitID.dk-mut iserlutit atuutilersitsinissamut kodimik, kodimillu atorallagassannik pissarsisinnaavutit. Taamaaliussaguit NemID pisariaqartissavat.

MitID appeqaruit taava MitID.dk-mut iserlutit kodinut takutitsissummik atuffassissummilluunniit inniminniissaatit.

MitID appeqanngikkuit taava innuttaasunut sullissivimmut saaffiginnissaatit.

Nunani allani najugaqaruit NemID-qarlutillu
NemID-qaruit taava MitID-taassaatit. Aningaaserivinnut Danmarkimiittunut Kalaallit Nunaanniittunulluunniit netbankeqarnissannut isumaqatigiissuteqaruit, taava mobilikkut nittartakkakkulluunniit netbankimut isissaguit MitID-qartariaqarputit. Peqanngikkuit MitID.dk aqqutigalugu MitID-taassaatit.

Nunani allani najugaqaruit NemID-qarnallu
NemID-qanngikkuit tullissaani Kalaallit Nunaannukaruit innuttaasunut sullissiviliartariaqassaatit. Sullissivilialeruit Danmarkimit passeq, biilersinnaanermut allagartaq immaqaluunniit uppernarsaatit ataani allassimasut marluk nassassavatit:

• Kinaassutsimut uppernarsaat
• Kuisinnermut uppernarsaat
• Inuunermut uppernarsaat

CPR-innut atatillugu uppernarsiniarlugu illit pineqartutit aperineqartassaatit, taamaanngippat illiuninnut uppernarsaasinnaasumik ilagisaqassaatit. Ilaquttat ikinngutilluunniit ilagisinnaavat. Innersuussutigissavarput uppernarsaasinnaasumik ilagisaqarnissat, qulakkeerneqarsinnaanngilarmi CPR aqqutigalugu ilinnut paasissutissat pisariaqartinneqartut pigineqartut.

Kinaassutsinnut uppernarsaasussaq MitID-qartariaqarpoq atorneqarsinnaasumik, taannalu minnerpaamik ulluni 30-ni MitID-qareersimassaaq.

MitID-mi mobilnormut nunap avataaneersut atorneqarsinnaappat?
Aap, MitID-mi mobilnormut nunap avataaneersut atorneqarsinnaapput.

Digitalikkut Allagarsiassatit (e-Boks) ammarniarukkit MitID-qartariaqarputit, NemID-lli paariinnarallassavat. Massakkut e-Boks ammarniarukku NemID atussavat. Piffissalli ingerlanerani MitID atortalissaaq. Taamaattumik siunissami e-Boks atorniarukku MitID-qartariaqarputit.

MitID aamma NemLog-in pillugit inatsisip Kalaallit Nunaannut atuutilernissaanut peqqussut